BLACKLISTED NA DAYUHANG PAKISTANI, INARESTO SA PAGADIAN CITY DAHIL SA ILIGAL NA PANANATILI | People’s Press PH

By Sherman Calotes | Philippine People's Press 

Pagadian City, Zamboanga del Sur — Inanunsyo ng Bureau of Immigration (BI) ang pagkakaaresto sa isang Pakistani national na matagal nang naka-blacklist matapos itong maaktuhang naninirahan nang ilegal sa Barangay Tiguma, Pagadian City noong Hunyo 16.

Kinilala ang dayuhan na si Sajjad Khan, 31 anyos, na hinuli ng mga operatiba ng BI katuwang ang Armed Forces of the Philippines at ang 53rd Infantry Battalion ng Philippine Army. Ang operasyon ay isinagawa alinsunod sa mission order na inisyu ni BI Commissioner Atty. Joel Anthony Viado batay sa natanggap na intelligence report ukol sa iligal na pananatili ni Khan sa bansa.

Batay sa beripikasyon ng BI, lumabas na naka-blacklist na si Khan mula pa noong 2016. Sa imbestigasyon, inamin umano ng dayuhan na pumasok siya sa Pilipinas sakay ng bangka sa pamamagitan ng tinatawag na “backdoor” o iligal na ruta ng migrasyon na kadalasang ginagamit ng mga undocumented foreigners.

"Siya ay nahaharap sa paglabag sa Section 37(a)(1) ng Philippine Immigration Act dahil sa iligal na pagpasok at kawalan ng dokumento bilang dayuhan," pahayag ng BI.

Matapos ang pag-aresto, dinala si Khan sa Zamboanga del Sur Police Provincial Office para sa dokumentasyon bago siya inilipat sa BI Warden Facility sa Camp Bagong Diwa, Taguig City kung saan pansamantala siyang nakakulong habang hinihintay ang proseso ng deportation.

Ayon pa sa BI, ang operasyon ay bahagi ng kautusan ni Pangulong Ferdinand Marcos Jr. na palakasin ang pagpapatupad ng mga batas sa imigrasyon at pagtitiyak ng seguridad sa mga hangganan ng bansa.

Ang pag-aresto kay Khan ay kasunod lamang ng isang naunang operasyon ngayong buwan kung saan mahigit 30 undocumented na dayuhan ang inaresto sa Bonifacio Global City, Taguig, dahil sa ilegal na pagtatrabaho.

Nanawagan ang BI sa publiko na maging mapagmatyag at agad iulat sa mga awtoridad ang sinumang dayuhang posibleng lumalabag sa batas upang mapanatili ang kaayusan at seguridad sa bansa.

Philippine People's Press | In Truth We Prevail